الحمد لله، والصلاة والسلام علىٰ رسول الله، أما بعد!
سونے اور چاندی کے علاوہ ہر وہ چیز جس کا کاروبار کیا جائے سامان تجارت ہے۔ اسلام نے مال تجارت پر بھی زکاۃ کو واجب قرار دیا ہے۔
عبد الرحمن بن عبد قاری فرماتے ہیں کہ میں عمر بن خطاب رضی اللہ عنہ کے عہد میں بیت المال کا نگران تھا، جب زکوٰۃ ادا کی جاتی وہ تاجروں کے مؤجل اور معجل سارے تجارتی مالوں کا حساب لگاتے، پھر پورے مال میں سے زکاۃ وصول کرتے۔‘‘ (الأموال از ابو عبيد، 1178، المحلى از ابن حزم، جلد4، ص 40)۔
سيدنا عبد الله بن عمر رضی اللہ عنہما فرماتے ہیں:
ليس في العروض زكاة إلا ما كان للتجارة (السنن الکبری للبيهقي، 7605)
سامان میں اسی وقت زکاۃ ہوگی جب اسے تجارت کی غرض سے رکھا جائے۔
سامان تجارت کے نصاب کا تعین سونے یا چاندی کے نصاب سے کیا جائے گا، ان دونوں میں سے جس کے حساب سے نصاب کا تعین کرنا فقراء ومساکین کے حق میں زیادہ بہتر ہو گا اسی کے نصاب کو لیا جائے گا، آج کل چونکہ چاندی کے نصاب کی مالیت کم ہے اس لیے چاندی کے حساب سے ہی نصاب کا تعین ہو گا۔ چاندی کا نصاب ساڑھے باون تولہ ہے۔
سامان تجارت کی زکاۃ کی ادائیگی کے لیے تاجر اپنے کل سامان کی موجودہ قیمت لگائے گا، اگر اس کا مال چاندی کے نصاب کو پہنچتا ہو اور سال گزر چکا ہو تو اڑھائی فیصد (چالیسواں حصہ)بطور زکاۃ کے ادا کرے گا۔
پرانے پلاٹ کے بارے میں آپ کی نیت گھر بنانے کی تھی، خریدو فروخت کے ذریعے باقاعدہ منافع کمانے کا ارادہ بالکل بھی نہیں تھا، آپ نے اسے مجبوری کی بنا پر بیچا ہے، اس لیے ان سالوں کی زکوٰۃ نہیں ہے۔
آپ نے پلاٹ کی رقم فلیٹ میں ایڈجسٹ کر دی ہے، جس کے بارے میں آپ کی نیت فی الحال کرائے پر دینے کی ہے، اس لیے اس میں بھی زکوٰۃ واجب نہیں ہے۔
فلیٹ کے کرائے سے حاصل ہونے والی آمدنی اور باقی جمع شدہ آمدنی اگر نصاب کو پہنچتی ہو، اور اس پر سال گزر جائے تو سال گزرنے کے بعد اڑھائی فیصد کے حساب سے زکوٰۃ دینا واجب ہو گا۔
اگر آپ مستقبل میں فلیٹ فروخت کرنے کی نیت بنا لیتے ہیں ، تو جب آپ اس کے فروخت کرنے کی نیت کریں گے، اس وقت سے زکوٰۃ کا سال شروع ہو گا اور سال گزرنے کے بعد زکوٰۃ دینا واجب ہو گی۔
والله أعلم بالصواب