الحمد لله، والصلاة والسلام علىٰ رسول الله، أما بعد!

 ہم اللہ تعالی سے دعا گو ہیں کہ وہ آپ کو حق پر ثابت قدم رکھے۔ انسان کو  کفریہ وسوسے شیطان کی طرف سے آتے ہیں۔ اگر انسان ان وسوسوں کو اپنا ایمان اور عقیدہ نہیں بناتا اور زبان پر نہیں لاتا تو وہ کافر نہیں ہو گاکیونکہ ایسے وسوسوں پر انسان کا اختیار نہیں ہوتا۔ اللہ تعالی کا ہم پر خاص فضل اور کرم ہے کہ اس نے اس طرح کے وسوسوں سے درگزر فرمایا ہے۔

سیدناابو ہریرہ  رضی اللہ عنہ فرماتے ہیں کہ  رسول اللہ ﷺ نے فرمایا:

إِنَّ اللَّهَ تَجَاوَزَ لِأُمَّتِي عَمَّا وَسْوَسَتْ أَوْ حَدَّثَتْ بِهِ أَنْفُسَهَا مَا لَمْ تَعْمَلْ بِهِ أَوْ تَكَلَّمْ (صحیح البخاری، الأيمان والنذور: 6664)

اللہ تعالٰی نے میری امت سے وسوسے اور ان کے دل کی باتوں سے درگزر فرمایا ہے جب تک وہ ان پر عمل پیرا نہ ہوں یا انہیں زبان پر نہ لے آئیں۔

بلکہ بعض احادیث مبارکہ میں رسول اللہ صلی اللہ علیہ وسلم نے فرمایا ہے کہ انسان کا اس طرح کے وسوسوں کو ناپسند کرنا اور زبان پر لانے سے خوف محسوس کرنا اس کے ایمان کے صحیح ہونے کی علامت ہے۔

سیدناابو ہریرہ  رضی اللہ عنہ فرماتے ہیں کہ نبی ﷺ کے صحابہ رضوان اللہ علیہم میں سے کچھ  لوگ حاضر ہوئے اور آپ سے پوچھا: ہم اپنے دلوں میں ایسی چیزیں محسوس کرتے ہیں کہ ہم میں سے کوئی ان کو زبان پر لانا بہت سنگین سمجھتا ہے، آپ ﷺ نے پوچھا:

وَقَدْ وَجَدْتُمُوهُ؟» قَالُوا: نَعَمْ، قَالَ: «ذَاكَ صَرِيحُ الْإِيمَانِ (صحيح مسلم، الإيمان: 132)

کیا تم نے واقعی اپنے دلوں میں ایسا محسوس کیا ہے ؟‘‘ انہوں نے عرض کی: جی ہاں! آپ نے فرمایا: ’’یہی صریح ایمان ہے۔

انسان  کو چاہیے کہ وہ کثرت کے ساتھ رب کے حضور دعا کرے اوراللہ تعالی کا ذکر کرے، شیطان مردود سے اللہ تعالیٰ کی پناہ مانگے، اس طرح کے وسوسوں کے بارے میں مزید سوچنے سے خود کو روکے، اللہ تعالی اپنی رحمت کرتے ہوئے ان وسوسوں کو اس سے دور کر دے گا۔ ان شاء اللہ۔

والله أعلم بالصواب.