الحمد لله، والصلاة والسلام علىٰ رسول الله، أما بعد!

شریعت کا عام اصول یہی ہے کہ جو کام  عظمت اور شرف والا ہو اس کو دائیں طرف  سے کیا جانا چاہیے اور جو اس کے برعکس ہو اسے بائیں طرف سے۔

امام نووی رحمہ اللہ فرماتے ہیں:

باب استحباب تقديم اليمين في كل ما هو من باب التكريم كالوضوءِ وَالغُسْلِ والتَّيَمُّمِ, وَلُبْسِ الثَّوْبِ وَالنَّعْلِ وَالخُفِّ وَالسَّرَاوِيلِ وَدُخولِ المسجد, والسواك, والاكتحال, وتقليم الأظافر, وَقَصِّ الشَّارِبِ وَنَتْفِ الإبْطِ, وَحلقِ الرَّأسِ, وَالسّلامِ مِنَ الصَّلاَةِ, وَالأكْلِ والشُّربِ, وَالمُصافحَةِ, وَاسْتِلاَمِ الحَجَرِ الأَسْوَدِ, والخروجِ منَ الخلاءِ, والأخذ والعطاء, وغيرِ ذَلِكَ مِمَّا هُوَ في معناه. ويُسْتَحَبُّ تَقديمُ اليسارِ في ضدِ ذَلِكَ, كالامْتِخَاطِ وَالبُصَاقِ عن اليسار, ودخولِ الخَلاءِ, والخروج من المَسْجِدِ, وخَلْعِ الخُفِّ والنَّعْلِ والسراويلِ والثوبِ, والاسْتِنْجَاءِ وفِعلِ المُسْتَقْذرَاتِ وأشْبَاه ذَلِكَ. (ریاض الصالحین: ص241)

دائیں طرف کو مقدم کرنے کے مستحب ہونے کے بارے میں یہ باب ہے، ہر وہ کام جو عزت والا ہو جیسے وضو کرنا، غسل کرنا، تیمم کرنا، کپڑے پہننا، جوتا پہننا، موزے پہننا، شلوار پہننا، مسجد میں داخل ہونا، مسواک کرنا، سرمہ لگانا، ناخن کاٹنا، مونچھیں کتروانا، بغلوں کے بال اکھاڑنا، سر منڈوانا، نماز سے سلام پھیرنا، کھانا اور پینا، مصافحہ کرنا، حجر اسود کو چھونا، بيت الخلاء سے نکلنا، کسی سے کوئی چیز پکڑنا یا کسی کو کوئی چیز دینا، اور اس کے علاوہ دیگر وہ تمام کام جو عزت وتکریم والے ہیں انہیں دائیں طرف سے کرنا افضل اور بہترہے۔ اس کے برعکس (یعنی جو کام عزت وتکریم والے نہیں ہیں) جیسے ناک صاف کرنا، تھوکنا، بیت الخلاء میں داخل ہونا، مسجد سے نکلنا، موزے ،جوتا، کپڑے اور شلوار اتارنا، استنجا کرنا، گندگی والے کام کرنااور اسی طرح کے دیگر امور میں بائیں طرف کو مقدم کرنا افضل اور بہتر ہے۔

E گھر سے نکلتے ہوئے کون سا پاؤں پہلے باہر نکالنا چاہیے اس حوالے سے کوئی خاص حدیث رسول اللہ صلی اللہ علیہ وسلم سے مروی نہیں ہے اور گھر سے باہر جانے میں کوئی عظمت وشرف کا پہلو بھی نہیں ہے اس لیے جو بھی پاؤں پہلےباہر نکال لیا جائے کوئی حرج نہیں ہے۔

والله أعلم بالصواب.