الحمد لله، والصلاة والسلام علىٰ رسول الله، أما بعد!

اگر مسجد بازار یا لوگوں کی گزرگاہ میں ہو، جس میں لوگ آتے جاتے رہتے ہوں، اس میں ایک سے زائد بار جماعت کروانا بالاتفاق جائز ہے۔

اگر مسجد کسی محلے میں  ہو جس میں مستقل امام بھی ہو، اس میں دوسری جماعت کروانے کی دو جوہات ہو سکتی ہیں:

1. اگر اس مسجد میں تمام لوگ مستقل امام کی اقتداء میں ہی نماز ادا کرتے ہیں، لیکن اگر کچھ افراد کبھی کبھار کسی عذر کی بنا پر لیٹ ہوجائیں تو ان کے لیے دوسری جماعت کروانا جائز ہے۔

سیدنا ابو سعید خدری  رضی اللہ عنہ فرماتے ہیں کہ رسول اللہ ﷺ نے دیکھا، ایک آدمی اکیلے ہی نماز پڑھ رہا ہے تو آپ ﷺ نے فرمایا:

أَلَا رَجُلٌ يَتَصَدَّقُ عَلَى هَذَا فَيُصَلِّيَ مَعَهُ!(سنن ابى داود، الصلاة: 574)

کیا کوئی آدمی اس پر صدقہ نہیں کر سکتا کہ اس کے ساتھ مل کر نماز پڑھے؟

2. اگر کچھ لوگ معمول بنا لیں، وہ اپنی الگ  جماعت کرواتے ہوں، تو یہ عمل مکروہ ہے کیونکہ رسول اللہ ﷺکےزمانے میں ایسا نہیں ہوتا تھا اور اس میں مسلمانوں کی اجتماعیت بھی بکھرتی ہے۔ لوگ بھی سستی کا مظاہرہ کریں گے اور دوسری جماعت کے ملنے کی امید میں پہلی جماعت سے لیٹ ہو جائیں گے۔

اگر کوئی شخص اکیلے یا جماعت کے ساتھ نماز پڑھ چکا ہو پھر وہ کسی  مسجد میں جائے جس میں جماعت ہو رہی ہو تو اسے چاہیے کہ جماعت کے ساتھ نماز پڑھ لے تاکہ اسے جماعت کی فضیلت حاصل ہو جائے۔

یزید بن اسود عامری  رضی اللہ عنہ کہتے ہیں کہ نبی اکرم ﷺ نے نماز کے بعد دو آدمیوں کو دیکھا جنہوں نے آپ کے ساتھ  نماز نہیں پڑھی تھی ،آپ نے انہیں پوچھا: ’’تم دونوں نے ہمارے ساتھ نماز کیوں نہیں پڑھی؟‘‘ انہوں نے عرض کیا: اللہ کے رسول ! ہم نے اپنے ڈیروں میں نماز پڑھ لی تھی۔ آپ نے فرمایا:

فَلَا تَفْعَلَا إِذَا صَلَّيْتُمَا فِي رِحَالِكُمَا ثُمَّ أَتَيْتُمَا مَسْجِدَ جَمَاعَةٍ فَصَلِّيَا مَعَهُمْ فَإِنَّهَا لَكُمَا نَافِلَةٌ (سنن ترمذى، أبواب الصلاة: 219)

ایسا نہ کیا کرو، جب تم اپنے ڈیروں میں نماز پڑھ لو پھر مسجد آؤ جس میں جماعت ہو رہی ہو تو لوگوں کے ساتھ بھی پڑھ لو یہ تمہارے لیے نفل ہو جائے گی۔

والله أعلم بالصواب.