الحمد لله، والصلاة والسلام علىٰ رسول الله، أما بعد!

اگر عورت کو رمضان المبارک میں حیض آ جائے تو اس کے لیے روزے کے احکامات درج ذیل ہیں:

حائضہ عورت کے لیے روزہ رکھنا حرام ہے، وہ رمضان المبارک کے بعد ان دنوں کی قضائی دے گی۔

سیدہ عائشہ صدیقہ رضی اللہ عنہا فرماتی ہیں: 

ہمیں بھی حیض آتا تھا تو ہمیں روزوں کی قضائی دینے کا حکم دیا جاتا تھا، نماز کی قضائی کا حکم نہیں دیا جاتا تھا۔ (صحيح مسلم، الحيض: 335)

اگر عورت کو روزے کی حالت میں مغرب سے کچھ لمحے پہلے بھی حیض کا خون آ جائے، تو اس کا روزہ فاسد ہو جائے گا اور وہ اس روزے کی قضائی دے گی۔

اگر عورت فجر سے پہلے حیض سے پاک ہو جائے تو اس پر روزہ رکھنا لازمی ہے، البتہ وہ غسل کو مؤخر کر سکتی ہے، کیونکہ روزے کے صحیح ہونے کے لیے غسل کرنا ضروری نہیں ہے۔

والله أعلم بالصواب.