الحمد لله، والصلاة والسلام علىٰ رسول الله، أما بعد!

ایک مسلمان کے لئے عبادات کی طرح احکام ومعاملات کی بھی معرفت ضروری ہے۔ آن لائن کاروبار میں بھی شریعت کے بیان کردہ تجارتی اصول وضوابط كو اپنانا ضروری ہے۔

خرید وفروخت کے سلسلے میں اسلام کے چند اہم اصول درج ذیل ہیں:

1. جس چیزکا کاروبار کیا جا رہا ہے وہ حلال ہو۔ حرام چیز کو بیچنا بھی حرام ہے۔  (سنن أبي داود:3488) (صحيح)

2. بيچنے والے اور خریدنے والے کے درمیان رضا مندی سے خرید و فروحت طے پائے ۔  (النساء: 29)

3. ایسا سامان بیچنا منع ہے جو انسان کی ملکیت میں نہ ہو۔  (سنن ترمذی: 1232) (صحيح)

4. سامان كو قبضہ میں لینے سے پہلے بیچنا منع ہے۔  (مسند أحمد: 15316)  (صحيح)

5. جس سامان کی تجارت مقصود ہے، اس کی قیمت معلوم ہو اور اس کی صفات وہی بتلائی جائیں، جو اس میں ہیں۔ اگر سامان میں کوئی عیب ہے تو اسے واضح کیا جائے۔ اگرآرڈر کے مطابق چیز نہ ہو،   تو اسے واپس کرنے کا اختیار ہوگا۔ ان تمام باتوں سے مقصود خریدنے والے  کو دھوکہ سے بچانا ہے۔ گویا ایسا کوئی بھی کاروبار جس میں دھوکہ ہو، جائز نہیں ہے۔ (صحيح مسلم: 1513)

6. تجارت سودی آمیزش سے پاک ہو، کیونکہ اللہ تعالی نے سود کو حرام قرار دیا ہے  (البقرة:275)

عطر،خوشبو، گھڑیاں اور حج و عمرہ سے متعلقہ  سامان كو مندرجہ بالا اصول وضوابط کی پابندی کرتے ہوئے بیچنا جائز ہے۔

والله أعلم بالصواب.