(64) غیر مسلموں کے فوت شدہ بچوں کے بارے میں حکم

کیا غیر مسلموں کے بچے جنتی ہیں ؟ ازراہ کرم کتاب وسنت کی روشنی میں جواب عنایت فرمائیں۔جزاکم اللہ خیرا

غیر مسلموں کے بچوں کے بارے میں سلف صالحین کے ہاں خاصا اختلاف ہے۔ صحیح قول کے مطابق غیر مسلموں کے بچے جنتی ہیں۔ اللہ تعالیٰ کا ارشاد ہے:

﴿ وَمَا كُنَّا مُعَذِّبِينَ حَتَّى نَبْعَثَ رَسُولاً﴾ (الإسراء:15)

’’اور ہماری سنت نہیں کہ رسول بھیجنے سے پہلے ہی عذاب کرنے لگیں۔‘‘

جب اللہ تعالیٰ کسی بالغ شخص کو دعوت پہنچنے سے پہلے عذاب نہیں دیتے تو بچے کو کس طرح عذاب دے سکتے ہیں۔

اس کی تائید اس حدیث سے بھی ہوتی ہے جس میں آپﷺ نے فرمایا:

’’ كل مولود يولد على الفطرة ‘‘  (متفق علیہ)

’’ہر پیدا ہونے والا فطرت پر پیدا ہوتا ہے۔‘‘

مسند احمد میں ہے کہ نبی کریمﷺ نے ارشاد فرمایا:

’’ النبي في الجنة والشهيد في الجنة والمولود في الجنة ‘‘  (مسند احمد :21125)

’’نبی، شہید اور مولود جنتی ہیں۔‘‘

لہٰذا اگر غیر مسلموں کے بچے بلوغت سے پہلے فوت ہوجائیں تو وہ جنتی ہیں۔

قرآن وحدیث کی روشنی میں احکام ومسائل

جلد 02