1۔ زید کی زوجہ اپنے حین حیات میں خالد کی زوجہ سے کہا کرتی تھی کہ تمھارا لڑکا میری لڑکی کے ساتھ مل کر دودھ پی لیا کرتا ہے اس اثنا میں زید کی زوجہ مذکورہ نے قضا کی بعد ہ زید نے چاہا کہ اپنی زوجہ متوفی کی لڑکی کے ساتھ خالد کے لڑکے کی نسبت کردے تب خالد کی زوجہ نے کہا کہ میرے لڑکے نے زید کی زوجہ کا دودھ پیا ہے اور خلفا کہتی ہوں کہ ایک بار خود بھی اپنے لڑکے کو دودھ پیتے ہوئے دیکھا ہے اور بھی دو عورتوں نے بیان کیا ہے کہ ہم لوگوں نے بھی زید کی زوجہ متوفی سے اس کی حیات میں سنا ہے کہ خالد کے لڑکے نے میرا دودھ پیا ہے تو اب صورت مرقومہ بالا میں عورتوں کی گواہیاں معتبر ہوں گی یا نہیں اور خالد و زید کی اولاد میں باہم رضاعت تصور کی جائے گی یا نہیں اور در صورت رضاعت ہونے کے اگر زید اپنی کسی لڑکی کے ساتھ خود خالد مذکور کا نکاح کر دینا چاہے تو ہو سکتا ہے یا نہیں؟
2۔عمرو کی تین بیبیاں ہیں ان میں سے ایک نے بکر کی لڑکی کو دودھ پلایا ہے تو اس صورت میں عمرو کی سب بیبیوں کی اولاد دبکر کی اولاد پر حرام ہو جائے گی یا جس عورت نے دودھ پلایا ہے اسی کی اولاد اور بکر کی اولاد میں رضاعت شمار کی جائے گی؟
1۔اس صورت میں رضاعت ثابت ہے یعنی خالد کے جس لڑکے نے زید کی زوجہ کا دودھ پیا ہے وہ لڑکا زید کا اور زید کی اس زوجہ کا رضاعی بیٹا ہے اور زید کی اولاد کا رضاعی بھائی ہوگیا۔ ثبوت رضاعت کے لیے عورت کا بیان کافی ہے پس خالد کے جس لڑکے نے زید کی زوجہ کا دودھ پیا ہے اس لڑکے میں اور زید کی اولاد میں مناکحت جائز نہیں ہے اور یہ رضاعت خود خالد اور زید یا خالد و زوجہ زید و اولاد زید کی طرف متعدی نہیں ہے پس اگر زید خود خالد کے ساتھ اپنی کسی لڑکی کا نکاح کر دینا چاہے تو ہو سکتا ہے۔
(عقبہ بن حارث سے روایت ہے کہ انھوں نے ام یحییٰ بنت ابی اہاب رضی اللہ تعالیٰ عنہا سے شادی کر لی تو ایک عورت آئی اس نے کہا میں نے تم دونوں (عقبہ اور اس کی بیوی ام یحییٰ رضی اللہ تعالیٰ عنہا ) کو دودھ پلایا ہے (یعنی یہ آپس میں بہن بھائی ہیں)انھوں نے نبی کریم صلی اللہ علیہ وسلم سے مسئلہ دریافت فرمایا (تم اس کے ساتھ) کس طرح (تعلق زن و شوقائم کرسکتےہو) حالانکہ یہ کہہ دیا گیا ہے( تم اس کے رضاعی بھائی ہو اور وہ تمھاری رضاعی بہن ہے؟
عقبہ نے اسے الگ کردیا اور اس نے ان کے علاوہ کسی اور خاوند سے نکاح کرلیا)
[2](متفق علیہ بلوغ المرام مطبوعہ دہلی ص75واللہ اعلم بالصواب۔
(دودھ پینے سے وہ رشتے حرام ہوجاتے ہیں جو نسب سے حرام ہوتے ہیں)
2۔اس صورت میں عمرو کی سب بیبیوں کی اولاد جو عمر و کے نطفے سے ہے بکر اس اولاد پر حرام ہے جس نے عمرو کی کسی بی بی کا دودھ پیا ہے اسی طرح اگر عمرو کی اس بی بی کی جس نے بکر کی اولاد کو دودھ پلایا ہے اس قسم کی اولاد ہو جو عمرو کے سوا دوسرے شوہر کے نطفے سے ہو وہ بھی بکر کی اس اولاد پر حرام ہوگی کیونکہ اس صورت میں عمرو کی سب بیبیوں کی اولاد مرقومہ بالا بکر کی اس اولاد کی رضاعی بھائی ہیں خواہ بطورعینی یا علاتی یا اخیافی اور بھائی بہن نسبی کسی طرح ہوں خواہ عینی یا علاتی یا اخیافی ان میں مناکحت حرام ہے پس اسی طرح رضاعی بھائی بہن میں بھی خواہ کیسے ہی ہوں مناکحت حرام ہوگی جیسا کہ گزر چکا ہے۔
[1] ۔صحیح البخاری رقم الحدیث(2516)
[2] ۔صحیح البخاری رقم الحدیث (2502)صحیح مسلم رقم الحدیث (1447)
[3] ۔حوالہ بالا۔
ماخذ:مستند کتب فتاویٰ
