سرچ انجن کی نوعیت:

تلاش کی نوعیت:

تلاش کی جگہ:

(268) نابالغہ کا نابالغ سے نکاح کرنا

  • 23033
  • تاریخ اشاعت : 2024-03-29
  • مشاہدات : 579

سوال

السلام عليكم ورحمة الله وبركاته

ہندہ نے اپنی ایک لڑکی نابالغہ (چھ سات برس کے سن ) کا عقد ایک لڑکے نابالغ (نو دس برس کے سن ) سے کرادیا اور لڑکی نابالغہ تین چار روز کے لیے سسرال بھی گئی اس کے بعد آج تک اپنی سسرال نہیں گئی اب بالکل بالغ ہے اور نکاح سابق کو ناپسند کرتی ہے اور اپنی سسرال جانا نہیں چاہتی ہے چونکہ اس کا شوہر بالکل آوارہ ہے اور اس کا شوہر بھی مخاطب نہیں ہو تا ہے ایسی حالت میں بلا طلاق کے اس لڑکی کا نکاح ہو سکتا ہے یا نہیں؟


الجواب بعون الوهاب بشرط صحة السؤال

وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!

عورت شرعاً ولی نہیں ہو سکتی پس ہندہ نے جو اپنی نابالغہ لڑکی کا عقد ایک نابالغ لڑکے سے کرادیا یہ نکاح بلا اذن ولی ہوا اور نکاح جو بلا اذن ولی ہو۔ شرعاً باطل ہے لہٰذا ایسی حالت میں بلا طلاق کے اس لڑکی کا نکاح جدید ہو سکتا ہے مشکوۃ (ص 262)میں ہے۔

عائشة رضي الله عنها قالت : قال رسول الله صلى الله عليه وسلم : " أيما امرأة نكحت بغير إذن وليها فنكاحها باطل فنكاحها باطل ، فنكاحها باطل ،[1]

(الحدیث رواہ احمد والترمذی و ابو داؤد وابن ماجہ والدارمی )

(عائشہ رضی اللہ تعالیٰ عنہا   بیان کرتی ہیں کہ رسول اللہ صلی اللہ علیہ وسلم  نے فرمایا : جس عورت نے اپنے ولی کی اجازت کے بغیر نکاح کیا اس کا نکاح باطل ہے اس کا نکاح باطل ہے اس کا نکاح باطل ہے )  نیز مشکوۃ (ص263)میں ہے۔

أَبِي هُرَيْرَةَ ، قَالَ : " لا تُزَوِّجِ الْمَرْأَةُ الْمَرْأَةَ ، وَلا تُزَوِّجِ الْمَرْأَةُ نَفْسَهَا فَإِنَّ الزَّانِيَةَ هِيَ الَّتِي تُزَوِّجُ نَفْسَهَا [2](رواہ ابن ماجه)

(ابو ہریرۃ رضی اللہ تعالیٰ عنہ  بیان کرتے ہیں کہ رسول اللہ  صلی اللہ علیہ وسلم  نے فرمایا :" کوئی عورت کسی عورت کا نکاح نہ کرے نہ عورت خود اپنا نکاح کرے کیوں کہ بدکار عورت ہی اپنا نکاح خود کرتی ہے)


[1] ۔ مسند احمد (6/47) سنن الدارمی (2/185) سنن ابی داؤد رقم الحدیث (2083)سنن الترمذی رقم الحدیث (1102)سنن ابن ماجہ رقم الحدیث (879)

[2] ۔سنن ابن ماجہ رقم الحدیث(1882)

  ھذا ما عندی والله اعلم بالصواب

مجموعہ فتاویٰ عبداللہ غازی پوری

کتاب النکاح ،صفحہ:470

محدث فتویٰ

ماخذ:مستند کتب فتاویٰ