جس عورت کا خاوند فوت ہو جائے اس کی عدت کتنی ہے اور وہ عدت کہاں گزارے نیز دوران عدت اسے کن امور سے لحاظ رکھنا چاہیے؟ کتاب و سنت کی روسے جواب دیں ۔(ایک سائلہ گوالمنڈی لاہور)
ارشاد باری تعالیٰ ہے:
"اور تم میں جو لوگ فوت ہو جائیں اور بیویاں چھوڑ جائیں وہ عورتیں اپنے آپ کو چار ماہ اور دس دن عدت میں رکھیں ۔"
اس آیت کریمہ میں اللہ تعالیٰ نے عدت وفات چار ماہ دس دن بیان فرمائی ہے۔یہ آیت کریمہ ہر طرح کی عورت خواہ وہ مدخولہ ہو یا غیر مد خولہ اورجوان ہو یا بوڑھی کی عدت وفات کو شامل ہے صرف حاملہ عورت اس سے مستثنیٰ ہے کیونکہ سورۃ الطلاق میں اس کی عدت وضع حمل بتائی گئی ہے۔
تو جب عورت کا خاوند فوت ہو جائے تو وہ اسی گھر میں عدت گزار ے گی جہاں اس کا خاوند فوت ہوا یا جہاں اس کے خاوند کی وفات کی خبر اس کے پاس پہنچی ۔
فریعہ بنت مالک بن سنان رضی اللہ تعالیٰ عنہا جو کہ ابو سعید خدری رضی اللہ تعالیٰ عنہ کی بہن تھیں وہ رسول اللہ صلی اللہ علیہ وسلم کے پاس آئی اور آپ صلی اللہ علیہ وسلم کو بتایا کہ اس کا خاوند اپنے بھگوڑے غلاموں کی طلب میں نکلا تو اس نے طرف قدوم میں ان کو پالیا انھوں (غلاموں )نے اس کو قتل کر دیا ۔ اس کی وفات کی خبر آچکی ہے۔ پھر اس نے آپ صلی اللہ علیہ وسلم سے پوچھا کہ اپنے گھر بنو خدرہ میں واپس چلی جاؤں جہاں میرے والدین رہتے ہیں کیونکہ میرے خاوند نے میرے لیے اپنا ذاتی گھر کوئی نہیں چھوڑا تو نبی صلی اللہ علیہ وسلم نے اولاً اسے رخصت دی پھر بلا کر فرمایا:
"تو اپنے اسی گھر میں ٹھہری رہ یہاں تک کہ عدی پوری ہو جائے۔"
تو انھوں نے وہاں پر چارماہ دس دن عدت گزاری ۔ فرماتی ہیں۔ جب عثمان بن ابی عفان رضی اللہ تعالیٰ عنہ کا دور خلافت آیا تو انھوں نے یہ مسئلہ پوچھنے کے لیے مجھے پیغام بھیجا ۔ میں نے انہیں اس بات کی اطلاع دی تو انھوں نے بھی یہی فیصلہ صادر فرمایا۔
(مؤطا امام مالک 1462ابو داؤد (2300) مسند احمد 6/370،420،421،الرسالہ للشافعی (1214) ترمذی (1204)دارمی 2/168مسند طیالسی (1664) موارد الظمان (1332) مستدرک حاکم 2/2908) رواء الغلیل (1231)
اس صحیح حدیث کی روسے عورت کو اسی گھر میں عدت گزارنی چاہیے جس گھر میں اس کا خاوند فوت ہو جائے یاجس گھر میں اسے خاوند کے فوت ہونے کی اطلاع آئے اور دوران عدت عورت کو زیب و زینت کرنا منع ہے۔جیسا کہ اُم سلمہ رضی اللہ تعالیٰ عنہا سے مروی ہے۔
"ایک عورت کا خاوند فوت ہو گیا تو انہیں اس کی آنکھیں خراب ہونےکا ڈر لا حق ہوا تو وہ رسول اللہ صلی اللہ علیہ وسلم کے پاس آئی آپ صلی اللہ علیہ وسلم سے سرمہ کی اجازت طلب کی، آپ صلی اللہ علیہ وسلم نے فرمایا وہ سرمہ نہ لگائے (کیا وہ دور اچھا تھا جب جاہلیت کے زمانے میں) عورت ایک سال کے لیے خراب کپڑے یا برےسے جھونپڑے میں پڑی رہتی تھی جب سال پورا ہوتا تو وہ اونٹ کی مینگنی اس وقت پھینکتی جب کتا سامنے سے گزرتا (اگر کتانہ گزرتا تو وہ کم بخت اسی طرح پڑی رہتی)دیکھو چار ماہ تک سرمہ نہ لگائے۔"
(بخاری 5338،5345،5334،1281)مسلم (1486) ابو داؤد (2299) ترمذی 500نسائی 6/201احمد 6/235،326،426)
"زینب رضی اللہ تعالیٰ عنہا فرماتی ہیں میں اُم حبیبہ رضی اللہ تعالیٰ عنہا زوجہ نبی صلی اللہ علیہ وسلم کے پاس اس وقت آئی جب ان کے باپ ابو سفیان فوت ہوئے تو اُم حبیبہ رضی اللہ تعالیٰ عنہا نے زرد رنگ کی خوشبو وغیرہ منگوائی تو اس میں سے کچھ ایک چھوٹی بچی کو لگائی ۔ پھر اپنے رخساروں پر لگائی پھر فرمایا اللہ کی قسم مجھے خوشبو کی ضرورت نہیں (کیونکہ وہ بیمارتھیں )مگر میں نے اس لیے لگائی کہ رسول اللہ صلی اللہ علیہ وسلم کو فرماتے ہوئے سنا ہے اور قیامت پر ایمان رکھنے والی عورت کے لیے حلال نہیں کہ وہ کسی میت پر تین دن سے اوپر سوگ کرے سوائے بیوی کے کہ وہ چار ماہ دس دن سوگ کرے۔"
ان احادیث صریحہ سے معلوم ہوا کہ ایسی عورتیں جن کے خاوند وفات پا جائیں وہ دوران عدت زیب و زینت مثلاً خوشبو لگانا سرمہ ڈالنا نیا لباس پہننا زیورات زیب تن کرنا وغیرہ جیسے امور سے اجتناب کریں اور جس گھر میں خاوند فوت ہوا ہو اسی گھر میں چار ماہ دس دن عدت گزارے یا وہاں جہاں اسے خاوند کی فوتگی کی اطلاع ملے، اس کے بعد وہ اپنے والدین کے گھر جا سکتی ہے۔ یا نئی شادی کرنی ہو تو کروا سکتی ہے دوران عدت ان امور سے اجتناب لازم ہے۔(مجلۃ الدعوۃ جنوری 1998ء)
ھذا ما عندی والله اعلم بالصواب
