السلام عليكم ورحمة الله وبركاته
کیا کوئی انسان اپنی پدری بہن کی بیٹی سے نکاح کر سکتا ہے، اگر نہیں کر سکتا تو اس کی کیا دلیل ہے، وضاحت کریں؟
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
قرآن کریم نے محرمات کو تفصیل سے بیان کیا ہے، ان میں کچھ خونی رشتے ہیں اور کچھ سسرالی ، جبکہ کچھ رشتے دوھ پینے سے حرام ہو جاتے ہیں۔ جو رشتے خون کی وجہ سے حرام ہوتے ہیں ان میں ایک بہن کی بیٹی بھی ہے۔ چنانچہ ارشادِ باری تعالیٰ ہے: ’’ تم پر تمہاری مائیں، تمہاری بیٹیاں ، تمہاری بہنیں ، تمہاری پھوپھیاں، خالائیں ، بھائی کی بیٹیاں اور بہن کی بیٹیاں حرام ہیں۔‘‘ [1]
اس آیت کریمہ میں ’’ بنت الاخت ‘‘ بہن کی بیٹیاں عام ہیں، خواہ حقیقی بہن کی بیٹیاں ہوں یا پدری یا مادری بہن کی بیٹیاں ہوں۔ لہٰذا ہمارے رجحان کے مطابق مطلق طور پر بھانجی حرام ہے خواہ وہ حقیقی بہن کی بیٹی ہو، یا پدری بہن کی یا مادری بہن کی ، اس میں خصوصیت کی کوئی دلیل نہیں لہٰذا اسے عموم پر ہی رکھا جائے گا۔ ( واللہ اعلم)
[1] النساء: ۲۳۔
ھذا ما عندي والله أعلم بالصواب
ماخذ:مستند کتب فتاویٰ
