السلام عليكم ورحمة الله وبركاته
مسجد کا خازن مسجد کی جمع شدہ رقم سے ضرورت مند حضرات کو قرض حسنہ دےدیتا ہے،نیز وہ اس رقم سے اپنا کاروبار بھی کرتا ہے ،حاصل شدہ منافع کا نصف مسجد فنڈ میں جمع کردیتا ہے اور نصف خودرکھ لیتا ہے،کیا یہ طرز عمل شریعت کی رو سے درست ہے؟
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
مسجد کی جمع شدہ رقم امانت ہے،اسے مسجد کے مصارف میں ہی استعمال کرنا چاہیے ، اسے اپنے ذاتی مصرف میں لانا یا کسی ضرورت مند کو بطور قرض حسنہ دینا جائز نہیں ہے۔ہاں اگر کچھ رقم مسجد کی وقتی ضروریات سے زائد ہواورانتظامیہ اس امرکی خازن کو اجازت دے کہ تم کسی ضرورت مند کو بطور قرض دے سکتے ہوتو ایسا کیا جا سکتا ہے لیکن اس کے لیے بھی شرط یہ ہے کہ جب مسجد کو رقم کی ضرورت ہو تو قرض لینے والا حیل و حجت سے کام نہ لے بلکہ اسے واپس کردے تاکہ مسجد کے کام میں رکاوٹ نہ بنے اسی طرح اگر مسجد کے فالتو فنڈ کو تجارت میں لگاناہے تو بھی انتظامیہ کے فیصلے کے مطابق اسے تجارت میں لگایاجا سکتا ہے بشرطیکہ شرح منافع پہلے سے طے کر لی جائے،صورت مسئولہ میں اگر خازن انتظامیہ کی اجازت کے بغیر ایسا کرتا ہے تو قطعاًجائز نہیں اور اگر مسجد کی انتظامیہ نے اسے اجازت دے رکھی ہے تو مسجد کے فالتو چندےکو ذکر کردہ مصارف میں خرچ کیا جا سکتا ہے۔(واللہ اعلم)
ھذا ما عندي والله أعلم بالصواب
ماخذ:مستند کتب فتاویٰ
