میں مسجد میں داخل ہواتو نماز عشاء کی جماعت کھڑی تھی لیکن نماز شروع کرنے سے پہلے مجھے یاد آیا کہ میں نے تو مغرب کی نماز نہیں پڑھی۔تو کیا اس صورت میں میں پہلے نماز مغرب ادا کروں۔ اور پھر جماعت میں شامل ہوجائوں یا نماز مغرب عشاء کی نماز کے بعد ادا کرلوں؟

---

الجواب بعون الوهاب بشرط صحة السؤال

وعلیکم السلام ورحمة الله وبرکاته!

الحمد لله، والصلاة والسلام علىٰ رسول الله، أما بعد!

جب آپ مسجد میں آیئں اور نماز عشاء کھڑی ہو اور آپ کو یاد آئے کہ آپ نے تو مغرب کی نماز ہی نہیں پڑھی تو اس صورت میں آپ نماز مغرب کی نیت کے ساتھ جماعت میں شامل ہوجایئں جب امام چوتھی رکعت کے لئے اٹھے تو آپ تین پڑھ کر بیٹھیں رہیں انتظار کریں اور جب امام سلام پھیرے تو اس کے ساتھ سلام پھیر دیں اہل علم کے صحیح قول کے مطابق اس صورت میں امام اور مقتدی کی نیت کا اختلاف نقصان د ہ نہیں ہے۔اوراگر آپ اکیلے نماز مغرب ادا کرلیں اور پھر نماز عشاء کا جو حصہ پایئں اسے جماعت سے ادا کرلیں تو اس میں بھی کوئی حرج نہیں۔(شیخ ابن بازرحمۃ اللہ علیہ )

ھذا ما عندی واللہ اعلم بالصواب

فتاویٰ اسلامیہ :جلد1

صفحہ نمبر 409

محدث فتویٰ