السلام عليكم ورحمة الله وبركاته
ایک عورت کو باقاعدگی سے ہر مہینے میں تقریباً تین چار دن ماہواری آتی ہے۔ مگر بسا اوقات ایسا ہوتا ہے کہ ماہواری ہونے کے چند دن بعد دوبارہ سیاہ رنگ کا خون ایک دن آتا رہتا ہے۔ خلافِ عادت اس سیاہی مائل خون آنے پر اُسے نماز، روزہ ادا کرنا چاہیے یا نہیں؟
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
سیاہی مائل سرخ خون حیض کا خون ہے۔ اس صورت میں نماز چھوڑ دینی چاہیے۔ چنانچہ حدیث میں ہے۔ ’ اِنَّ دَمَ الحَیضِ اَسوَدُ یُعرَفُ ۔‘ (سنن النسائی،بَابُ الْفَرْقِ بَیْنَ دَمِ الْحَیْضِ وَالِاسْتِحَاضَةِ،رقم:۳۶۳،سنن أبی داؤد،بَابُ مَنْ قَالَ إِذَا أَقْبَلَتِ الْحَیْضَةُ تَدَعُ الصَّلَاةَ،رقم:۲۸۶)
ماہواری کا خون مہینے میں ایک سے زیادہ دفعہ بھی آسکتاہے۔چنانچہ امام بخاری رحمہ اللہ نے اپنی ’’صحیح‘‘ میں ان الفاظ میں باب قائم کیا ہے: ’’بَابُ اِذَا حَاضَت فِی شَهرٍ ثَلَاثَ حِیَضٍ…‘‘ ’’یعنی اگر عورت کو ایک مہینے میں تین حیض آ جائیں تو؟‘‘پھر دلائل سے اس بات کو ثابت کیا ہے۔
ھذا ما عندي والله أعلم بالصواب
