السلام عليكم ورحمة الله وبركاته
سنا ہے کہ جو شخص ستر ہزار مرتبہ لا الہ الا اللہ پڑھے اس کو دوزخ کی آگ سے نجات ملے گی کیا یہ بات صحیح ہے؟ (الطاف حسین، دیپالپور)
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
لا الہ الا اللہ کی اس تعداد کے متعلق تو کسی صحیح حدیث کے بارے میں مجھے علم نہیں البتہ صحیح احادیث میں یہ بات موجود ہے کہ جس شخص نے صدق دل سے لا الہ الا اللہ کہا اور اس پر اس کی موت آ گئی وہ جنت میں داخل ہو گا۔ عمر بن خطاب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا بےشک میں ایک ایسا کلمہ جانتا ہوں جو آدمی اس کو دل کی سچائی کے ساتھ کہتا ہے پھر اس پر اس کی موت آ جاتی ہے اللہ تعالیٰ نے اس پر آگ حرام کر دی ہے اور وہ کلمہ "لا الہ الا اللہ" ہے۔(صحیح ابن حبان، مسند احمد 1/23، مستدرک حاکم 1/74)
لہذا لا الہ الا اللہ کو جاننا چاہیے اور صدق دل سے اللہ تعالیٰ کی الوہیت پر ایمان رکھنا چاہیے اور اللہ تعالیٰ سے دعا بھی کرنی چاہیے کہ اسی پر ہماری موت آ جائے۔ آمین، اور اسی کلمے کو احادیث میں افضل الذکر قرار دیا گیا ہے لہذا اس کا ذکر بھی کرتے رہیں البتہ ذکر کے مصنوعی اور نو ایجاد طریقوں سے اجتناب کریں۔
ھذا ما عندي والله أعلم بالصواب
