السلام عليكم ورحمة الله وبركاته
بروز عیدین وایام تشریق میں پڑھے جانے والے ( تکبیر کے) مشہور الفاظ" الله اكبر الله اكبر ّلااله الا الله والله اكبر الله اكبر ولله الحمد کیا یہ کسی صحیح حدیث روایت سے ۔
1) نبی کریم ﷺ سے ثابت ہیں؟
2) کسی صحابی سے ثابت ہیں؟
3) کسی تابعی سے ثابت ہیں ۔؟
4) محدثین عظام سے ثابت ہیں؟
ان کے ان مواقع پر پڑھنے کی شرعی حیثیت واضح فرمائیں ۔
نوٹ : القول المقبول لحافظ عبدالروؤف (ص 660 تا 666 میں) میں تفصیل ہے مگر سمجھ نہیں آرہی ۔ ( محمد صدیق ایبٹ آباد)
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
ایک حدیث میں آیا ہے کہ نبیﷺ ایام عید کی تکبیروں میں درج ذیل کلمات تھے ۔ الله اكبر ّالله اكبر ‘لااله الاالله والله اكبر ‘الله اكبر ولله الحمد سنن دارقطنی (2/49ح1721)
اس روایت کی سند موضوع ہے ۔ عمروبن شمر کذاب راوی ہے۔ جابر الجعفی سخت ضعیف رافضی ہے ۔ نائلی بن نجیح ضعیف ہے دیکھئے کتب اسماء الرجال وغیرہ
ایک روایت میں آیا ہے کہ عبداللہ بن عباس رضی اللہ عنہ تکبیرات عیدین میں درج ذیل الفاظ پڑھتے تھے : " الله اكبر كبيرا الله اكبر كبيرا الله اكبر واجل ‘الله اكبر ولله الحمد " ( مصنف ابن ابي شيبہ 2/167 ح5650)
اس کی سند صحیح ہے
سیدنا سلمان الفارسی رضی اللہ عنہ یہ الفاظ پڑھتے تھے : الله اكبر الله اكبر الله اكبر" ( مصنف عبدالرزاق 11/294،295 ح 20581 والبیہقی 3/316 وسندہ حسن )
ابراہیم النخعی کہتے ہیں :" كانوا يكبرون يوم عرفة واحدهم مستقبل القبلة في دبر الصلوة :الله اكبر الله اكبر ‘ لااله الا الله والله اكبر الله اكبر ‘ ولله الحمد " ( مصنف ابن ابی شیبہ ج 2ص 167ح5649 وسندہ صحیح)
درج بالاتکبیرات صحابہ وتابعین سے ثابت ہیں لہذا ایام عیدین میں انھیں پڑھنے میں کوئی حرج نہیں بلکہ اقتداء بالسلف کی روسی ثواب کی امید ہے ،مختصر یہ کہ آپ کی ذکر کردہ دعا پڑھنی تابعین سے ثابت ہے اور اس پر عمل صحیح ہے ،والحمد للہ ( شہادت مئی 2004ء)
ھذا ما عندي واللہ أعلم بالصواب
