السلام عليكم ورحمة الله وبركاته
ہل حدیث شمارہ نمبر ۳۹ میں ایک حدیث نقل کی گئ ہے کہ رسول اللہ صلی اللہ علیہ وسلم جب وضو کرتے تو ہتھیلی میں پانی لے کر داڑھی میں ڈالتے اور ٹھوڑی کا خلال کیا کرتے تھے، اس حدیث کا حوالہ اور اس کے صحیح ہونے کے متعلق معلومات درکار ہیں، اولین فرصت میں آگاہ فرمائیں؟
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
واضح رہے کہ وضو میں داڑھی کا خلال تاکیدی سنت ہے ، البتہ غسل جنابت میں خلال سے کام نہیں چلے گا ، بلکہ داڑھی کو دھونا ہو گا کیونکہ ہر بال کے نیچے جنابت ہوتی ہے ، یہ ان کتب حدیث میں مروی ہے۔ [1]
اس حدیث کو دور حاضر کے بعض محققین نے ضعیف قرار دیا ہے حالانکہ یہ حدیث صحیح لغیرہ ہے ، علامہ البانی رحمۃ اللہ لکھتے ہیں کہ ولید بن زوران کے علاوہ اس حدیث کی سند کے تمام راوی ثقہ ہیں، ابن زوران سے بہت سے لوگوں نے اس حدیث کو بیان کیا ہے، امام ابن حبان رحمہ اللہ نے اسے اپنی کتاب ’’الثقات ‘‘ میں ذکر کیا ہے، اس طرح کی حدیث حسن کہلاتی ہے، خاص طور پر اس کے اور بھی طرق ہیں، امام حاکم نے اسے صحیح قرار دیا ہے اور امام ذہبی رحمہ اللہ نے بھی اس کی صحت کو برقرار رکھا ہے، ان سے پہلے ابن قطان بھی اسے صحیح قرار دے چکے ہیں اور اس حدیث کے بہت سے شواہد ہیں جن میں سے کچھ شواہد میں نے اپنی تالیف ’’ صحیح ابی داؤد‘‘ میں ذکر کئے ہیں۔ [2]
ان شواہد کی بناء پر یہ حدیث درجہ صحت تک پہنچ جاتی ہے۔ [3]
بہر حال یہ حدیث قابل حجت ہے اور دوران وضوء داڑھی کا خلال مشروع ہے۔ ( واللہ اعلم)
[1] سنن أبي داؤد ، الطھارة: ۱۴۵؛ سنن البیھقي ص ۵۴ ج۱؛ مستدرك حاکم ص ۱۴۹ ج۱۔
[2] رقم : ۱۳۳۔
[3] ارواء الغلیل ص ۱۳۰ ج۱۔
ھذا ما عندي والله أعلم بالصواب
