السلام عليكم ورحمة الله وبركاته
ایک عورت دریافت کرتی ہے کہ میں اپنی عمر کے بارھویں سال میں رمضان سے پہلے بالغ ہو گئی تھی مگر باقاعدہ روزے چودھویں سال میں رکھنے شروع کیے۔ کیا مجھے ان گزشتہ سالوں کے روزے رکھنے ہوں گے؟
وعلیکم السلام ورحمة الله وبرکاته!
الحمد لله، والصلاة والسلام علىٰ رسول الله، أما بعد!
آپ پر واجب ہے کہ گذشتہ سالوں میں بالغ ہونے کے بعد جو رمضان کے روزے آپ نے چھوڑے ہیں، ان کی قضا دیں، خواہ اکٹھے رکھیں یا تھوڑے تھوڑے کر کے متفرق طور پر، اور اللہ سے استغفار کر دیں اور توبہ کریں کہ آپ نے رمضان میں بغیر کسی عذر شرعی کے ایک بڑی معصیت کا ارتکاب کیا اور اروزے چھوڑ دیے، امید ہے اللہ تعالیٰ بخش دے گا، اور اس نے فرمایا ہے:
﴿وَتوبوا إِلَى اللَّهِ جَميعًا أَيُّهَ المُؤمِنونَ لَعَلَّكُم تُفلِحونَ ﴿٣١﴾... سورةالنور
’’اور تم سب اللہ کی طرف توبہ کرو، اے ایمان والو تاکہ تم فلاح پاؤ۔‘‘
اور فرمایا:
﴿وَإِنّى لَغَفّارٌ لِمَن تابَ وَءامَنَ وَعَمِلَ صـٰلِحًا ثُمَّ اهتَدىٰ ﴿٨٢﴾... سورة طه
’’اور میں بخشنے والا ہوں اس بندے کو جو توبہ کر لے، ایمان لائے، نیک عمل کرے اور سیدھی راہ اختیار کرے۔‘‘
ھذا ما عندي والله أعلم بالصواب
