|
السلام عليكم ورحمة الله وبركاته احرام کی حالت میں سر میں کھجلی کرنے سے بال گر جائیں تو کیا دم پڑ تا ہے؟ قرآن وحدیث کی روشنی میں جواب دیں۔جزاکم اللہ خیرا الجواب بعون الوهاب بشرط صحة السؤالوعلیکم السلام ورحمة اللہ وبرکاته! الحمد لله، والصلاة والسلام علىٰ رسول الله، أما بعد! احرام کی حالت میں کھجلی کے دوران خود بخو د گرنے والے بالوں پر کوئی فدیہ نہیں ہے۔ کیونکہ یہ بغیر قصد کے گرتے اور ٹوٹتے ہیں۔ حضورﷺ سے یہ ثابت ہے کہ انہوں نے احرام کی حالت میں غسل کیا اور سر کو ملا تھا ۔او ریہ بدیہی طور پر معلوم ہے کہ غسل کرتے وقت سر کو ملنے سے بال ضرور ٹوٹتے اور گرتے ہیں۔ صحیح بخاری میں ہے: عبداللہ ابن عباسؓ اور مسور بن مخرمہ میں احرام کی حالت میں سر دھو نے پر اختلاف ہوا ۔ عبداللہ بن عباسؓ دھونے کے قائل تھے اور مسور بن مخرمہ سر کو دھونے کے قائل نہیں تھے یہ معاملہ ابوایوب انصاری ؓ کے پاس لےجایا گیا تو انہوں نے نہاتے ہوئے اپنے سر پر پانی ڈالا اور اس کو آگے پیچھے سے ملا اور فرمایا نبیؐ نے بھی اسی طرح کیا تھا۔ (رقم الحدیث:1840) لہٰذا احرام کی حالت میں کھجلی کی وجہ سے ٹوٹنے والے بالوں پر کوئی فدیہ نہیں ہے۔ ھذا ما عندي والله أعلم بالصواب
فتویٰ کمیٹیمحدث فتویٰ |
