حضرت انس رضی اللہ عنہ سے مروی ہے کہ وہ اللہ کے رسول صلی اللہ علیہ وسلم کے ساتھ بیٹھے تھے اور ایک شخص یوں دعا کر رہا رہا تھا ؛ اے اللہ میں آپ سے سوال کرتا ہوں اس کے ساتھ کہ تمام تعریفات آپ کے لیے ہیں، آپ کے سوا کوئی معبود نہیں ہے، آپ بہت ہی احسان کرنے والے ہیں، زمین وآسمان کو بنانے والے ہیں، بزرگی و جلال والے ہیں، یا حی یا قیوم۔ اس پر اللہ کے نبی صلی اللہ علیہ وسلم نے کہا کہ اس شخص نے اللہ سے اس نام کے ساتھ دعا کی ہے کہ جس کے ساتھ جب دعا کی جائے تو قبول کی جاتی ہے اور سوال کیا جائے تو عطا کیا جاتا ہے۔ علامہ البانی رحمہ اللہ نے اس روایت کو صحیح کہا ہے۔
حضرت برید بن حصیب سے روایت ہے کہ اللہ کے رسول صلی اللہ علیہ وسلم نے ایک شخص کو یہ کہتے سنا ؛ اے اللہ میں آپ سے سوال کرتا ہو اس کے ساتھ کہ بلاشبہ میں گواہی دیتا ہوں کہ آپ کے سوا کوئی معبود نہیں ہے اور آپ احد ہیں، صمد ہیں، آپ نے نہ کسی کو جنا ہے اور نہ آپ کو کسی نے جنا ہے اور آپ کا کوئی ہمسر نہیں ہے۔ اللہ کے رسول صلی اللہ علیہ وسلم نے اس پر کہا کہ اس شخص نے ایک ایسے نام کے ساتھ دعا کی ہے کہ جس کے ساتھ جب دعا کی جائے تو قبول کی جاتی ہے اور سوال کیا جائے تو عطا کیا جاتا ہے۔ علامہ البانی رحمہ اللہ نے اس روایت کو صحیح کہا ہے۔
