زید نے لفظ طلاق کہہ کر اپنی بی بی کو اپنے ایک دوسرے عزیز کے جو اس کا خالہ زاد بھائی ہے حوالے کر دیا اور بعد عرصہ دو ماہ کے عدت کے اندر اندر اس نئے شوہر مجوزہ کا انتقال ہو گیا اور وہ عورت پھر اپنے شوہر اول کے پاس آگئی اب زید از سر نو نکاح بغیر حلالہ کرے یا بعد حلالہ یا نکاح کی ضرورت نہیں ہے ؟بعض لوگوں نے لفظ طلاق سے طلاق مراد لے کر کہا ہے کہ تین طلاق سے منشا قرآن شریف پورا ہوجاتا ہے۔سائل حاجی محمد یعقوب مقام انبالہ۔
منشا قرآن شریف اور حدیث شریف کادربارہ طلاق یہ ہے کہ اگر ضرورت طلاق کی ہو تو صرف ایک طلاق دے دے پھر اگر رجعت کرنا چاہے یعنی طلاق جو اس کو دےچکا ہے واپس لے لینا چاہے تو عدت کے اندر واپس لے سکتا ہے اور اگر عدت گزرچکی ہوتو بتراضی طرفین حلالہ کے پھر سے نکاح کر سکتا ہے اگر بعد رجعت یا بعد نکاح جدید پھر کبھی ضرورت طلاق کی پیش آئے تو پھر صرف ایک طلاق دے دے ۔ یہ دوسری طلاق ہوگی یہ اور اول مل کر دو طلاقیں ہو جائیں گی اس دوسری طلاق کے بعد بھی عدت کے اندر رجعت کر سکتا ہے اور عدت گزر چکی ہو تو بتراضی طرفین بغیر حلالہ کے جدید نکاح کر سکتا ہے اس رجعت یا نکاح جدید کے بعد بھی اگر پھر کبھی ضرورت طلاق کی ہو تو اب بھی صرف ایک طلاق دے دے یہ تیسری طلاق ہو گی اور اب یہ اور اوپر والی دو طلاقیں مل کر تین طلاقیں ہوجائیں گی تین طلاقیں اس طریق سے دی جاسکتی ہیں۔
اب اس تیسری طلاق کے بعد نہ عدت کے اندر رجعت کر سکتا ہے اور نہ عدت گزر جانے پر بغیر حلالہ کے پھر سے نکاح کر سکتا ہے اور طریقہ مذکورہ کے برخلاف دو یا تین طلاقیں دے دینا (مثلا)دویا تین طلاقیں دے دے تو اس سے صرف ایک ہی طلاق پڑے گی دو یا تین طلاقیں نہیں پڑیں گی۔
صورت طلاق جو سوال میں مذکورہے اگر اس میں اس شخص نے برخلاف طریقہ مذکورہ بالا تین طلاقیں دے دی ہیں مثلاً: ایک ہی جلسہ میں تین طلاقیں دے دی ہیں تو اس صورت میں صرف ایک طلاق پڑے گی۔اگر عدت نہیں گزری ہے تو رجعت وہ شخص کر سکتا ہے اگر اس کے قبل اور دو طلاقیں نہیں دے چکا ہے اور اگر عدت گزر چکی ہے اور اس کے قبل دو طلاقیں نہیں دے چکا ہے تو بغیر حلالہ کے پھر سے نکاح کر سکتا ہے بتراضی طرفین اور اس صورت میں جو اس شخص نے اپنی اس مطلقہ بی بی کو دوسرے شخص کے حوالے کردیا یہ اس کی غلطی ہے اس صورت میں حلالے کی اصلاًضرورت نہیں صورت طلاق مندرجہ سوال کے بارے میں جو کچھ کہا گیا ہے یہ اس تقدیر پر ہے کہ اس شخص کی وہ مطلقہ بی بی بعد نکاح کے اس کی مدخولہ بھی ہو چکی ہو ورنہ عدت کے اندر رجعت نہیں کر سکتا ہاں بتراضی طرفین پھر سے نکاح کر سکتا ہے۔
(یہ طلاق (رجعی) دوبار ہے پھر یا تو اچھے طریقے سے رکھ لینا یا نیکی کے ساتھ چھوڑ دینا ہے)
(اور جب تم عورتوں کو طلاق دو پس وہ اپنی عدت کو پہنچ جائیں تو انھیں اچھے طریقے سے رکھ لو یا انھیں اچھے طریقے سے چھوڑدو)
(اور جب تم عورتوں کو طلاق دو پس وہ اپنی عدت کو پہنچ جائیں تو انھیں اس سے نہ روکو کہ وہ اپنے خاوندوں سے نکاح کر لیں جب آپس میں اچھے طریقے سے راضی ہو جائیں )
(اے لوگوں جو ایمان لائے ہو! جب تم مومن عورتوں سے نکاح کرو پھر انھیں طلاق دے دو اس سے پہلے کہ انھیں ہاتھ لگاؤ تو تمھارے لیے ان پر کوئی عدت نہیں جسے تم شمارکرو سو انھیں سامان دو اور انھیں چھوڑدو اچھے طریقے سے چھوڑنا)
(واللہ تعالیٰ اعلم بالصواب )(مسند امام احمد بن حنبل 1/265)
(ہمیں عبد اللہ نے بیان کیا انھوں نے کہا کہ مجھے میرے باپ نے بیان کیا وہ کہتے ہیں کہ ہمیں سعد بن ابراہیم نے بیان کیا وہ کہتے ہیں کہ مجھے میرے باپ نے بیان کیا انھوں نے محمد بن اسحاق سے روایت کیا انھوں نے کہا کہ مجھے داؤد بن حصین نے بیان کیا وہ عکرمہ مولی ابن عباس رضی اللہ تعالیٰ عنہ سے روایت کرتے ہیں وہ عبداللہ بن عباس رضی اللہ تعالیٰ عنہ سے روایت کرتے ہیں وہ بیان کرتے ہیں کہ بنو مطلب کے ایک فردرکانہ بن عبدیزید نے اپنی بیوی کو ایک ہی مجلس میں تین طلاقیں دے دیں پھر وہ اس پر سخت غمگین ہوئے راوی کہتے ہیں کہ پھر رسول اللہ صلی اللہ علیہ وسلم نے ان سے دریافت کیا کہ "تم نے اس(اپنی بیوی) کو کیسے طلاق دی؟"رکانہ رضی اللہ تعالیٰ عنہ نے بتایا کہ میں نے اسے تین طلاقیں دے دیں راوی کہتے ہیں کہ آپ صلی اللہ علیہ وسلم نے پوچھا ۔"کیا ایک ہی مجلس میں؟"انھوں نے جواب دیا جی ہاں آپ صلی اللہ علیہ وسلم نے فرمایا:"یہ صرف ایک طلاق ہی ہے۔اگر تم چاہو تو اس اس سے رجوع کرلو۔ "راوی بیان کرتے ہیں کہ انھوں نے رجوع کرلیا)
(رسول اللہ صلی اللہ علیہ وسلم کو ایک آدمی کے بارے میں بتایا گیا جس نے اپنی بیوی کو اکٹھی تین طلاقیں دے دی تھیں آپ صلی اللہ علیہ وسلم غصے کی حالت میں اٹھ کھڑے ہوئے اور فرمایا :"کیا میری موجودگی میں اللہ تعالیٰ کی کتاب سے کھیلا جاتا ہے؟"حتی کہ ایک آدمی کھڑا ہو کر کہنے لگا : اے اللہ کے رسول اللہ صلی اللہ علیہ وسلم !کیا میں اسے قتل نہ کردوں؟)کتبہ: محمد عبد اللہ (27/شوال 1329ھ)
[1] ۔سنن النسائی رقم الحدیث(3401)
ماخذ:مستند کتب فتاویٰ
