'' کہ ابن مسعود  رضی اللہ تعالٰی عنہ اور رسول اللہ کے صحابہ کرام  رضی اللہ تعالٰی عنہم وترمیں رکوع سے قبل قنوت پڑھا کرتے تھے ''۔
    علامہ ابن تر کماین نے الجوہر النقی میں اور علماہ البانی حفظہ اللہ نے ارواء الغلیل میں اس کی سند کو مسلم کی شرط پر صحیح کہا ہے لہٰذا صحابہ کے عمل سے بھی وتر میں قنوت رکوع سے قبل ہی ثابت ہوئی ۔ امام ابن ابی شیبہ آثار صحابہ کے بعد فرماتے ہیں ھذا القول عندنا ہمارا قول یہی ہے ۔ (مصنف ابن ابی شیبہ۲/۳۰۶)
   ۴)    عاصم کہتے ہیں میں نے انس بن مالک رضی اللہ تعالٰی عنہ سے قنوت کے بارے میں سوال کیاتو آپ نے فرمایا رکوع سے پہلے ہے پھر میں نے کہا فلاں شخص آپ کے حوالے سے بیان کرتا ہے کہ رکوع کے بعد ہے تو انس رضی اللہ تعالٰی عنہ نے کہا وہ غلط کہتا ہے نبی اکرم  صلی اللہ علیہ وسلم  نے رکوع کے بعد صرف ایک ماہ قنوت کیا ۔ یہ اس وقت ہو اجب آپ نے ۷۰ قراء صحابہ کو مشرکوں کی ایک قوم (بنی عامر ) کی طرف تعلیم کیلئے بھیجا تھا ان کے اور رسول اللہ صلی اللہ علیہ وسلم کے درمیان وعدہ تھا (انہوں نے وعدہ شکنی کرتے ہوئے ان قراء کو شہید کر ڈالا ) تو آپ نے ایک مہینہ تک رکوع کے بعد قنوت کیا اور ان پر بد دعا فرمائی ۔
                                    (بخاری ۱/۱۹۷، ص ١٩٧ مطبوعہ مکتبہ دارالسلام)
    اس روایت سے یہ بات بھی معلوم ہوتی ہے کہ جو دُعا ہنگامی حالات میں مسلمانوں کی خیر خواہی ، کفار و مشرکین اور دشمنان اسلام کیلئے بد دعا کے طور پر کی جاتی ہے وہ رکوع کے بعد ہے جسے قنوتِ نازلہ کہا جاتا ہے اور جو دعا رکوع سے قبل مانگی جاتی ہے وہ قنوت وتر ہے اور قنوت وتر میں ہاتھوں کا اٹھانا نبی اکرم  صلی اللہ علیہ وسلم  کی کسی صحیح حدیث میں ثابت نہیں ۔ رکوع سے قبل قرأ ت سے فارغ ہونے کے بعد اسی طرح بغیر ہاتھ اٹھائے دعا مانگنی چاہئے جو لوگ قنوت وتر میں ہاتھ اٹھا کر دعا کرتے ہیں ہو اسے قنوت نازلہ پر قیاس کرتے ہیں ۔