السلام عليكم ورحمة الله وبركاته
کیا یہ حدیث صحیح ہے کہ عصر کے بعد نماز نہیں حتیٰ کہ سورج غروب ہو جائے اور صبح کے بعد نماز نہیں حتیٰ کہ سورج طلوع ہو جائے مگر مکہ میں، مگر مکہ میں، مگر مکہ ہیں؟
وعلیکم السلام ورحمة اللہ وبرکاته!
الحمد لله، والصلاة والسلام علىٰ رسول الله، أما بعد!
یہ حدیث ’’ مگر مکہ میں‘‘ کے زائد الفاظ کے ساتھ تو ضعیف ہے، البتہ اصل حدیث صحیحین وغیرہ میں ثابت ہے۔ صحابہ کرام رضی اللہ عنہ کی ایک جماعت نے روایت کیا ہے کہ نبی اکرمﷺ نے فرمایا:
(لاَ صَلاَةَ بَعْدَ الصُّبْحِ حَتَّى تَرْتَفِعَ الشَّمْسُ، وَلاَ صَلاَةَ بَعْدَ الْعَصْرِ حَتَّى تَغِيبَ الشَّمْسُ ")(صحيح البخاري مواقيت الصلاة باب لاتتحري الصلاة قبل غروب الشمس حديث:586وصحيح مسلم صلاة المسافرين باب الاوقات التي نهي عن الصلاة فيها حديث:827)
’’ فجر کی نماز کے بعد کوئی نماز سورج کے بلند ہونے تک نہ پڑھی جائے۔ اسی طرح عصر کی نماز کے بعد سورج ڈوبنے تک کوئی نماز نہ پڑھی جائے۔‘‘
لیکن علماء کے صحیح قول کے مطابق اس سے وہ نماز مستثنیٰ ہے، جس کا کوئی خاص سبب ہو، مثلاً نماز کسوف، نماز طواف اور تحیۃ المسجد تو ان نمازوں کو تمام اوقات حتیٰ کہ ممانعت کے اوقات میں بھی ادا کیا جاسکتا ہے جیسا کہ صحیح احادیث سے یہ استثنا ثابت ہے۔
ھذا ما عندي واللہ أعلم بالصواب
ماخذ:مستند کتب فتاویٰ
